في جنينة الحيوانات
زقزوق خرج ويا ظريفة وكان بعيد عنكم زهقان
وفكروا في فسحة لطيفة وخشوا في جنينة الحيوان
ظريفة بنت العفريتة فضلت تضايقه في أحواله
ولما وقفوا قصاد شيتا بسرعة راحت قايله له :
ظ: ألا قوللي يا منيل على عينك
ز: ومنيل على عينك دي بقى تبقى ايه؟
ظ: ده اسم الدلع يا منيل
ز: وعاوزة ايه من المنيل على عينه؟
ظ: عاوزة أقولك إن صحيح القرود كانوا بني آدمين زمان وربنا سخطهم؟
ز: أيوه
ظ: أمال إنت ربنا ما سخطكش ليه؟
ز: له في ذلك حكم
ظ: يعني لو كان ربنا سخطك مش كان زماننا دلوقتي بناكل الشهد؟
ز: إزاي بقى؟
ظ: كان زماني جبت لك سلسلة ولفيت بيك على القهاوي نلم لنا قرشين كويسين؟
ز: ياريت يا شيخة كان ربنا سخطني قرد ولا كنتش شفت وشك اللي يقطع الخميرة من الفرن ده
ظ: أنا وشي يقطع الخميرة من الفرن؟
ز: هو الفرن بس؟ ده يقطعها من الفرن ومن البيت ومن كل حتة فيها خميرة
ظ: إخص عليك يا زقزوق بتشتمني؟ إهئ إهئ إهئ
ز: عيطنا؟ عملتي عيشة؟
ظ: عيشة في عينك قليل الأدب أنا ظريفة على سن ورمح ياريتك كنت إتنيلت واتخلقت قرد كنت ريحتني من وشك
ز: فعلا كنت زماني دلوقتي بشتغل في حديقة الحيوانات وبيجوا الناس يحدفولي عيش فينو وسوداني وكل حاجة
ظ: فشر والله ما كنت أحدفلك غير زلط ودبش وزفت مغلي على دماغك ..
وبعد دوشة وقلنا وقال زقزوق عمل زي المجنون
حصل ما بين اتنين أشكال ما يحلهاش الا المأذون
وبعد حبة (هاف تايم ) جرس المنبه رن قوام
أتاري زقزوق كان نايم وكل ده كان في الأحلام
ليست هناك تعليقات:
إرسال تعليق